Eldgos - Rán Flygenring

 

Myndabókinn Eldgos fékk barna- og unglingabókmenntaverðlaun Norðurlandaráðs 2023. Í rökstuðningi dómnefndar segir:

"Verðlaunahafinn í ár hefur skapað myndabók fulla af sjónrænum sprengikrafti um áhrifin sem villt og óhamin náttúra hefur á fólk. Mynd og texti fléttast listilega saman í fjöruga og sprenghlægilega sögu um sundurleitan hóp ferðamanna við gosstöðvar. Frásögnin iðar af lífsþrótti og bæði fangar og skopast að hrifningu okkar á öfgafullum náttúrufyrirbærum. En hún dregur einnig fram hvernig mótsagnakenndar tilfinningar vakna bæði þegar jörð klofnar, hraun flæðir og ný fjöll verða til og þegar við stöndum frammi fyrir hversdagsógnum á borð við lúsafaraldur eða sjáum nánasta umhverfi okkar yfirfyllast af ferðamönnum. Frásögnin er þannig þrungin spennu sem er sprottin úr samspilinu milli hins ægistóra og hins agnarsmáa.

Myndirnar í bókinni eru sneisafullar af forvitnilegum og fyndnum smáatriðum sem hrífa hinn unga lesanda með sér. Er náttúran til eingöngu okkur til skemmtunar eða ættum við að taka meiri ábyrgð á samskiptum okkar við hana? Eldgos kveikir von um að við getum fundið leið til að lifa í sátt við náttúruna."

Nú þegar Norræna bókmenntavikan varpar ljósi á 80 ára lýðveldishátíð Íslands tökum við okkur far með Kaktusi ásamt fullri rútu af ferðamönnum. Kaktus er ekki spenntur fyrir ferðinni en það á nú heldur betur eftir að breytast þegar óvæntir viðburðir gerast…..

"Afsakið, hvað kallar maður þetta" hrópar Kaktus og bendir á rauðan og glóandi blett á gráu hrauninu.