NUNAT AVANNARLERNI NUNARSUAQ
Ukioq manna Nunat Avannarliit Atuakkat sapaatip akunneqartitsinerminni meeqqat, inuusuttut inersimasullu qaaqquai, isumaliutersuutigeqqullugu nunarsuarmiooqataanerup nunarsuarmilu inissisimaffimmik nassaarnerup isumaa. Nunat Avannarlermiuusugut kingornussatta ilagaat ilisimasassarsiorluni angalajumassuseqarneq, nunarsuarmilu sumiiffinni assigiinngitsorpassuarni Nuna Avannarlerneersut "tumaannik" nassaassaqarpoq. Oqaluttuarisaanermi qangarsuarnitsanik nassaat vikingit nalaaneersut aammalu nunanit avannarlernit ilisimasassarsiornerni annerni minnernilu eqqunneqarsimasut piorsarsimassutsimut tunngassutillit.
Maani nunami inuit 8 milliardiuvugut, ataatsimoorlutalu nunarsuarput ilusilersorparput. Killeqarfiit qaangerlugit nunanut allanut angerlarsimaffipput qimallugu nunarsuarmi angalasinnaavugut piffinnut nalusatsinnut. Angalaneri sivikitsuusinnaapput sivisusinnaallutillu, piffissamp aaliangersimasup iluani pillutik, imaluunniit ataavrtumik angalaarnerullutik. Nunarsuaq naaffeqanngingajattutut angissusilittut, mikisunnguatulluunniit misinnarsinnaavoq, unali qularutissaanngilaq - inuit 8 milliardit nunarsuarmi inuummata namminneq nunarsuartitk immikkuullarissoq pilersillugu tamarluinnarmillu oqaluttuassartatik immikkuullarissut ingerlateqqittarmatigit.
Nunarsuaq atuakkiat atorlugit takujuk
Atuarneq periarfissatsialaavoq nunarsuarmi angalaartuusilluni misigisaqarnissamut. Atuakkiani piffiit nalusagut tupigusuutigisinnaasarpagut, sumiiffiit nammineerluta takunikuusagut ilisarisinnaallutigit, piorsarsimassutsikkut ulluinnatsigullu assigiinngissutsit assigiissutsillu paasisinnaallutigit. Atuakkiat aqqutigalugit takorluuisinnaassutsitsinni kilometererpassuit kisissaanngitsut angalasinnaavugut angerlarsimaffipput qimanngikkaluarlutigu. Allaqanngilarmi atuakkiortoq peqatigiinnaripput . isigisaqarluta, tusaasaqarluta, naamasaqarluta paasisassarsiorluta ilikkagaqarlutalu. Tamatigullu illallattaasinnaasarpugut maluunniit qullipilaarsinnaasarluta.
Nunarsuaq ukioq manna atuakkiani
Ukioq manna atuakkiat assut uummaaripput apeqqutillu angisuut qaqillugit - inuunermut toqumullu tunngasut, qujassutissatut pigisat, pisinnaatitaaffiit nunarsuarmilu akisussaaqataaneq.
Inuk ilivitsuusutut inissippaat, inuullu piginnaasai ataatsimuulersitsisuullutillu avissaartuutsitsisuusinnaasut oqaluttuaralugit. Ukioq manna atuakkat toqqakkagut Nunat Avannarliit nersornaatitut atuakkiortunut tunniuttagaannik nersornaatisisinneqarnikuupput, neriuutigaarpullu atuartuminnut soqutiginnilersitsiumaartut aammalu atuareernerani iliuutsinik pilersitsinissamut pilerileritsiumaartut.
